سلبات الأفلام الأمريكية / 2

الانترنت بالسينما الأمريكية انترنت غريبة عجيبة …

الانترنت في السينما الأمريكية (تصدر أصواتا) وهو أمر شديد الغرابة …

إذ تقريبا لا يخلو مشهد من فيلم أمريكي لبطل يفتح الانترنت إلا نرى بأنه تصدر أصوات تكتكة من الكمبيوتر أثناء فتح الموقع …

أي أنه عند تحميل الصور والنصوص في الصفحة نسمع أصوات تكتكة الكترونية (تك تك تتك تتتتك تك تتك) …

والمضحك أن الانترنت في معظم الأفلام (خاصة القديمة نسبيا منها) تراها تختلف بشكل جذري عن صفحات الانترنت المعروفة …

فترى أن صفحة الانترنت عبارة عن أشكال ثلاثية الأبعاد تروح وتجيء وأصوات تظهر … إلخ

لا أدري كيف لكن من الواضح أن الصفحات التي تظهر على الشاشة ليست مصممة وفق أي من طرق تصميم الصفحات القياسية (أتحدث عن خبرة في المجال)

بل من الواضح بأن المخرج أحضر أي مصمم غرافيكي أو ربما أي شخص من الأشخاص الذين يعملون على أحد برامج الكمبيوتر الضخمة التي ترسم الخدع السينمائية وطلب منه تصميم صفحة انترنت … بالتأكيد طالما أن صاحبنا ليس من اختصاصه تصميم صفحات الانترنت فقام بالتصميم على برامج رسومية عادية وترك لخياله تحديد كيف يكون شكل صفحة الانترنت

بس أحلى شي وقت بيكون البطل عم يخترق شبكة وزارة الدفاع الأمريكية أو شبكة شي مجموعة من المصارف لحتى يحوّل مبلغ معين لحسابه …

بتلائي الصفحة صارت معباية شغلات عم تشعل وتطفي وكلمات متل WARNING ومنطقة سرية وأشكال وألوان ,, وشعار النسر الأمريكي عم يفتل بنص الشاشة ومناظر بيفرط ضحك عليها أي واحد عندو خبرة بسيطة كتير بالشبكات وبيعرف كيف بكون الدخول لشبكة …

هللأ بنجي لشغلة اختراق شبكة شي بنك وهالئصة اتجلت كتير بفيلمي Swordfish و Entrapment (اللي هنن من أحلى الأفلام اللي شايفها بس ما بيمنع أحكي عن مشهد اختراق الشبكة المصرفية)

طبعا بعد كتير من التحذيرات والشغلات اللي عم تفتل وتضوي وتزمّر بيفتح مع الأبطال صورة كبيرة لخريطة العالم … وأكيد لازم يكون في كود سري بيكتبوه حتى يئدروا يتحكموا بهالخريطة …

وأحلى شي وقت بتم التحويل … بيحمى الوضع تمام وبتكتر كتير أصوات ال (تتتتتتك تك تك تتتتك) بعدين بيطلع سهم عالشاشة بيتجه من المنطقة اللي انسحبت منها المصاري وبيتجه لعند المنطقة الجديدة اللي تم التحويل لإلها !!!!

يللي بشوف الأفلام الأمريكية ممكن يظن أنو الانترنت بأمريكا أحلى من الانترنت عنا …

يا أخي أهم شي أنو الانترنت عندهم بتطالع أصوات حلوة

منرجع مع سلبات جديدة …

أنس

رأيان حول “سلبات الأفلام الأمريكية / 2”

  1. أخي أنس …

    أنا حاولت أعرف أي نظام يستخدموا فلم أفلح حتى الآن …

    ما أظنه ماكنتوش و لا يونكس و لا ويندوز …

    مع العلم أن الويندوز مشهور ، لماذا لا يظهر …

    رد
  2. الحقيقة أنوا نجاح الأفلام الأجنبية وتطورها بسرعة كان متلازم مع التطور العلمي يلي عم بيكون يومي تقريباُ.. .. من خلال برامج الكومبيوتر يلي مابتخليك تقوم من ورا الجهاز وأنت عم تخرج فليم
    وصارت كل الأفلام تعتمد على أنظمة الرؤية الثلاثية الأبعاد
    وهاداا.. براي عم يخلي الفلم من دون سيناريوه قوي .. عم يعتمد المنتج والمخرج على قوة المؤثرات الصورتية والمرئية …

    سعيدة عروووف

    رد

أضف تعليق