اي بلا Ladies First بلا بطيخ !

حسناً, دعونا نعترف … المرأة في مجتمعنا ليست مظلومة كما يُشاع بل نحن المظلومون, سألتني كيف؟

أحد المواقف يلي بتصير كتير وصايرة معي كتير … بتكون واقف عند بيّاع الشاورما بعز الصيف, حرارة الشمس عم تطبخك من جهة, ولهيب النار يلي طالع من سيخ الشاورما عم يطبخك من جهة تانية والمحل معجوق والدنيا شووووب وفي شي ألف زلمة بالمحل ! والكل آعد مزوق وعم ينتظر دوره بكل احترام .. بتجي بنت بتطلبلها كمية كبيرة .. بس طبعاً لأنها بنت ما لازم تنتظر عالدور فوراً ببلشوا موظفين وشغيلة المحل ينادو لبعض :”مشّي الآنسة” أو “مشّي المدام”, وبيكون قبلها في ألف شب ورجّال كبير عم ينتظروا الدور صرلن ساعة .. بس لا ما بيصير Ladies first وانشالله عمر الدور والعالم يلي عم تنتظر !!!
والأحلى من هيك أنو مرة من المرات كنت عند أحد محلات الأكل وصار نفس الموقف, ويلي صدمني بعدين أنو البنت بعد ما طلعت اتجهت عالسيارة وإذ طلع في بالسيارة شب عم ينتظرها, أول ما اعدت بالسيارة شغّل ومشي .. طلع الشب حاسبها أنو اذا نزل هوة رح يطوّل وعرفان انو البنت رح يمشّوها بسرعة مشان هيك بعت البنت واعد هو بالسيارة !!

نفس الشي بالمكرو (السرفيس), بتلاقي الوحدة اشّرت للسرفيس وهية عرفانة انو معبّى .. بوقّف السرفيس, بتمد راسها .. بتتطلع .. بتزور الشباب وهية عم تقول بقلبها :”يلّا يا قليلين الزوق, شي حدا يقوم” … يعني بصراحة شو ذنبه الشب يقوم؟ ارجعي امشي كم خطوة لفوق يمكن تلاقي محل او انتظري شوي أو خدي سرفيس تاني من غير خط بنزلك بمكان قريب ومن هنيك بتاخدي سرفيس تاني أو اي حل تاني تدبري حالك فيه !

مرّة كنت أنا بشعبة التجنيد عم أعمل تأجيل دراسي (وما أدراكم ما شعبة التجنيد والبهدلة يلي هنيك) .. المهم اجت وحدة والدة أحد الأشخاص هية عم تساويله وراقه … فوراً العساكر صاروا محترمين كأنهم جايين من جادة (الشانزيليزيه) مباشرةً على شعبة التجنيد وقالولها تفضلي مدام فوتوها لجوة وخلوها تقعد على كرسي وفات أحدهم أخد وراقها وصار يدور فيهم من غرفة لغرفة ومن توقيع لتوقيع ورجعلها معاملتها خالصة بزمن قياسي ! المخلوقة مبينة درويشة ومواطنة عادية لا أنو بيعرفوها ولا مدعومة ولا دفعت مصاري .. هلأ تصرف العساكر أنا مو ضده حلو انو يحترموا المخلوقة بس اذا هنن عندن القدرة انو يتعاملوا باحترام ويمشّوا المعاملات بسرعة ليش ما بطبقوا هالشي عالكل؟ ليش نحنا بعاملونا بهالطريقة؟؟ طبعاً هالشي ما بينطبق بس على شعب التجنيد بل بيصير بكتير دوائر ومؤسسات تانية.

هي مجرد أمثلة قليلة من ضمن أمثلة كتيرة منصادفها بحياتنا اليومية, دائماً الأنثى البواب مفتوحة الها وين ما راحت .. بالشغل, بالسوق, بالمطاعم, يمكن وين ما كان ما عدا البيت P:

وأنا كردة فعل ومحاولة منّي لإصلاح المجتمع رفعت شعار (بلا Ladies first بلا بطيخ!) وهاد الشعار ما بيدعوا أبداً للتعصب ضد النساء بل بيدعوا فقط لوضع الأمور بنصابها .. يعني اذا انت مسؤول عن دور .. مشّي الناس عالدور بغض النظر عن الجنس .. واذا انت موظف تعامل مع الشب متل ما بتتعامل مع البنت … واذا انت مسؤول بمطعم وفاتت شلة بنات لا ترحب فيهن زيادة عن اللزوم وتحطهم على احسن طاولة وتحط شلة الشباب على اسوأ طاولة أو تعتذر منهم بحجة أنو المطعم محجوز … يعني باختصار أنا أدعوا فقط للمساواة لا أكثر ولا أقل.

مين بيرفع معي شعار (بلا Ladies First بلا بطيخ) ؟

57 رأي حول “اي بلا Ladies First بلا بطيخ !”

  1. ها ها ها
    ما قلتلك نحنا قرايبين ما عم تصدقني
    أنا من زمان رافع هالشعار
    بصراحة من المواقف يلي خلتني ناصر هالشعار هو حرس الكلية عنا “أيام ما كنا نروح عالكلية ” المهم مستحيل أنو يخلوا طالب يفوت ما معوا بطاقة و إذا طالب ناقشهم بيكون يوم المنى وبيحاولوا بقا يبهدلوا هالطالب قدر الإمكان قدام الناس بمنعه عن الدخول وبنفس اللحظة بتدخل بنت حتى ما بيفكر أنو يطلب منها بطاقة وبيكتفي برمقها بنظرة وهزة رأس توحي لك بأنه يعرف هذه البنت منذ زمن
    المواقف يلي من هالشكل ما أكثرها بس لح أحكي آخر شي عن وظائف العمل أنو في كتير شركات في حال تكافؤ الفرص بيفضلوا يوظفوا البنت أكتر من الشب لأنوا لا عندها عسكرية و لا هموم ولا لح تجي بكرا تقلك زدلي معاشي ولا الذي منوا

    رد
  2. _أنا معك بقصة النظام ما في أحلى من النظام
    “المفروض الكل يتعامل نفس المعاملة”
    بس الشي إلي بيبكي مدري بيضحك
    إنو كل الإستبداد إلي عاشت فيه المرأة من وقت ما خلقت البشرية لهلق ..عادي و بيمرق…و وحدة خربطت الدور مشكلة ..والله مشكلة .
    على فكرة مو من زمان صار مسموح للمرأة تتواجد بالأمكنة
    إلي زكرتها .. كان ممنوع..

    _والرجل الشرقي مدري ليش بيحب يبين لطيف

    رد
  3. يا سيدي هاد رأي منذ اكثر من سنة وعلى كتر المواقف اللي بتعرض لها من السرفيس للسوق لوين مابدك هالمقولة جعلت المرأة تتمرد اكثر وتحول الرجل لمفسح مجال في كل وقت

    بالنسبة لي لو كانت مثلا سيدة عجوز افسح لها مكاني وقس على ذلك اما غير هيك مافي مجال

    يبدو صار بدنا جمعيات تدافع عن حقوق الرجل

    رد
  4. ذكرتني بتدوينة قديمة كاتبها
    http://www.feras.ws/blog/%D8%A7%D9%84%D9%85%D8%B1%D8%A3%D8%A9-%D9%81%D9%8A-%D9%85%D9%8F%D8%AC%D8%AA%D9%85%D8%B9%D8%A7%D8%AA%D9%86%D8%A7/
    هلأ شخصياً بشوف إنو عنا يا طخوا ياكسير مخو 🙂 يعني أنا مو ضد إنو بتعاملوا مع المرأة هيك لأنو صراحةً لو كانت خطيبتي أو أختي أو أمي , مابيهون عليي توقف بطابور رجال , بس يكون بالموضوع في إستغلال متل الشب يلي قاعد بالسيارة فهاد مو شب !لأنو القصة بدا شوية نخوة, شخصياً بشوف إنو حلو التعامل هيك معون بس كمان ياريت يعاملونا بجزء بسيط مت مابيعاملون ,أما إنو نحن ما يحترمونا و البنات يحترموهون فأنا ضد هالشي و معك بالشعار .
    🙂
    تحياتي
    فراس

    رد
  5. أخي أنس عميل حسابك ع شوية مصطلحات متل مجتمع ذكوري , رجل شرقي و بعض الكلمات العسيرة الفهم التي تعمر برؤوس فتياتنا (مشان الامانة , مو كل فتياتنا , بس السواد الأعظم) 🙂
    اذا انت أنس صاححلك الناس تقوم مشانك بالمكاري و يخلصولك وراقك وين ما كنت و تخلص امتحاناتك العملية بامتياز , اي ما بدك تشوف حالك؟
    يعني المجتمع و ب المشرمحي : سئسوء 🙂
    كمان للأمانة, البنت بمجتمعنا و خصوصا ع مستوى البيت مكبوتة و مقيدة.
    ملاحظة: ما زالت محاولاتي لدخول بعض الكافيتيريات مستمرة حتى يومنا هذا , خطة الانزال المظلي قيد الدراسة.
    بس الا ما فوت و بمعيتك 🙂

    رد
  6. بصراحة الموضوع حلو ومو حلــو ..

    مزبوط أنو المفروض الموظف أو العامل أو شو ما كان يحترم الدور ويمشي الناس بلا واسطات وبلا تفريق عنصري ؛)
    / شب ولا بنت / بس في بعض الأحيانا هاللفتات بتكون حلوة اذا كانت بمحلها ..

    مرة كنت ماشية بالشعلان واشتهيت منقوشة زعتر من عند معجنات الشعلان فتت كان كلو شباب وزلم .. قلي شو بدك قلتلو منقوشة دغري عطاني ياها ومشاني .. يعني ما كنت مضطرة استنى بين الرجال والشباب .. حاكم مو كل الشباب ظراف ولطاف ومهذبين !!

    بس لا تزودوها انتو الشباب بموضوع جمعيات الدفاع عن حقوق الرجل ..
    نحنا بالشرق يتمتع رجلنا الشرقي بصفات غير موجودة بالرجل الغربي و حلوة كتير منها الشهامة ..
    بقللك لازم الالتزام بس ببعض المواقف حلو يكون الشب شهم ..

    يعني اذا في ست فاتت عالباص معليش يقوم حدا يأعدها .. و اذا وحدة عم تستنا دور و درويشة و مو خرج تستنا معليش اذا مشاها شي شب قبلو .. وين المشكلة ؟

    رد
  7. شو يعني درويشة مو خرج تستنى؟ و ليش الشب لازم يقوم من كرسيه ليقعد وحدة محلو؟
    شو المشكلة اذا الوحدة استنت ع الدور؟ و شو المشكلة اذا استنت الباص التاني؟

    رد
  8. مرحباً جميعاً وشكراً عالآراء الظريفة …

    محمد ذكرنا كمان بشغلة الدخول عالكليات بدون بطاقات .. البنات معلش بس بالنسبة للشباب لازم يطّبق القانون !

    lee : الظلم يلي مرقت فيه المرأة على مر العصور على راسي وما عم نقول انو هاد الظلم مو مشكلة وخربطة الدور مشكلة بس كلشي لحال .. اذا المرأة تعرضت لأنواع مختلفة من الظلم مو يعني تعمل فينا الشي يلي عم نشوفه هلأ … لا تعملوا القصة متل الهولوكوست تبع اليهود 🙂

    أبو علي والله كلامك درر, هي المصطلحات تبع المجتمع الذكوري وحقوق المرأة بالفعل صارت متل الهولوكوست يلي ممنوع حدا ينكره او يحكي ضده …
    ومعك حق بالنسبة لنقطة انو تصرفات المجتمع هي مع المرأة هية يلي بتخلي معظم البنات عندن عقدة شوفة الحال .. كل الناس عم تدللن وبدها رضاهن شو بدهن احسن من هيك عيشة؟ هاد السبب يلي لما بتتناقش مع بنت عن الوضع السيء بالبلد وانو بدك تسافر وتترك البلد ومن هالحكي 99 بالمية من البنات بجاوبوك انو لا البلد منيحة وليش بدك تسافر والعيشة ظريفة هون … اجباري هيك رح يقولوا لأنن هنن مبسوطين كل الناس عم تدللن ..

    أبو علي بس قلي شو المحل يلي ما عم يفوتوك عليه وبتتدبر …

    رد
  9. صار وقت نرد على رنا ..

    مزبوط حكيك مو كل الشباب ظراف واوادم بس والله هي مو حجة .. الواحد وين ما راح رح يصادف الاوادم وغير الاوادم .. انتي اكيد رح تلاقيها لفتة حلوة بالنسبة الك بس كمان في قانون لازم يمشي عالكل … يمكن مع الوقت لما الشباب يلاقوا البنت عم تتعامل بشكل متلها متلن مو كأنها جوهرة نازلة من السما .. بتوقع بالتدريج تخف قصة التحرشات والمضايقات ..

    هلأ انا اذا كنت بالباص وفاتت وحدة ختيارة أو مرا حاملة ابنها على ايدها بقوم بقعدها … بس اذا وحدة صبية متلي متلها .. لأ …
    انا المثال يلي ضربتو عن السرفيس هو انتقاد لبعض البنات يلي بوقفو السرفيس وبيعرفوه معبى ومافي محل وبينتظروا بكل جآرة انو حدا يقوم !!! يعني بالباص نص مصيبة بس بالمكرو رح يقوم الشب يقعد عالارض بوضعية مزرية .. اي مو حكي هاد والله عيب !

    رد
  10. هلأ مزبوط إذا حامل ولد وختيارة من المفروض الشب يقوم واذا ما لقينا حدا من الشباب قام وانتخا نحن البنات منقوم !!!

    بس اذا صبية ما في داعي .. !!!

    انا ما عم قللك لازم

    بس اذا شفت بنت بمكان فيها رجال مو كتير ظراف ما رح يصير عليك شي اذا مشيتها قبلك
    وخاصة انو الرجل عندو قدرة على تحمل التعب اكتر من البنت !

    يعني بركي وحدة مغلوب على أمرها و زوجا متوفي وعم تنشنطط وتدفع فواتير معليش منمقرها نحنا الصغار شباب كنا او بنات

    لو كان عنا النظام مرتب و كلشي ساعتا منعمل كل واحد بالدور

    رد
  11. أنا معك إنو المرأة لازم توقف بالدور متلها متل البقية، وتنطر سرفيس متلها متلون، وتتعذب بمعاملات الدولة متلها متلون.

    وشخصياً، أنا ما بقبل آخد دور حدا، لا عند بياع الشاورما ولا بالميكرو.

    بس بالنهاية، بياع الشاورما… شب، وحارس الجامعة… شب، وشوفير السيرفيس اللي عو يوقفلها مع إنو ما في محلات فاضية… (أكيد حزرتوا) شب.

    يعني الذنب منتقاسمه 50/50

    أما عن إنو “دائماً الأنثى البواب مفتوحة الها وين ما راحت”، فبعتقد أنها ناتجة عن حرقة قلب، وما بتعنيها تماماً متل ما مكتوبة… صح؟

    رد
  12. بالحقيقة ما عم افهم شو يعني انتخا؟
    يعني اذا شب ما قام لوحدة بكون قليل نخوة؟
    >>نحن البنات منقوم !!!
    بانتظار هالمشهد بس بخاف العمر يغدرني 🙂
    >>بس اذا شفت بنت بمكان فيها رجال مو كتير ظراف ما رح يصير عليك شي اذا مشيتها قبلك وخاصة انو الرجل عندو قدرة على تحمل التعب اكتر من البنت !
    طبعا و خصوصا بعد شي 8 ساعات دوام و ساعة ركض ورا المواصلات
    >>يعني بركي وحدة مغلوب على أمرها و زوجا متوفي وعم تنشنطط وتدفع فواتير معليش منمقرها نحنا الصغار شباب كنا او بنات
    الشغلة شفقة؟
    و الشب يللي بالدور المفروض انو حياتو وردية؟

    رد
  13. رح اشرحلك معنى كلمة نخوة يا / أبو علي /

    والاختلاف لا يُفسد للود قضية وقبل الشرح

    الموضوع راجع للشخص نفسه إن كنتَ تريد أن تبدّي لن نقل إمرأة / بل شخص كبير بالعمر أو إمرأة مسنّة أو إنسان مقعد … / فهذا قرار شخصي يعود لك وحدك .. ولكلُّ منا ((الثقافة والرأي والتفكير ..))

    بالنسبة لكلمة نخوة فهي باللغة العربية : المروءة , الفخر .. وهي من الأخلاق الحميدة .. وديننا الحنيف وكل الأديان تقوم على الأخلاق …

    فإن كُنت أنا كفتاة أو غيري شاب, قام من مقعده ِ ليفسح مجالاً لرجل مسن أو إمرأة مسنّة أو مُتعبة أو رجل مُقعد فهي من أخلاقه الحميدة ..

    وتأكد أنك سترى من هذه المشاهد التي رأيتها مرات كثيرة .. أن تقوم فتاة لإمرأة وليس شاب هذا لا يدل إلا على أخلاقها الحميدة وحسن تربيتها ..

    فكلٌّ منّا حر يفعل ما يشاء وما يُمليه عليه قلبه …

    ولا تعقتد أخي الكريم أنكم وحدكم أنتم الرجال من تتعرضون لهذه المواقف ..
    فكثير من المرات ما تعرضنا نحنُ الفتيات بأن يُأخذ دورنا من قِبل فتاة سليطة و حاطة كيلو مكياج و على آخر طرز ..

    المشكلة بالرجال الذين لا يمشون على الحق و بيتاخدو بأقل شغلة …

    بقا لا كتير تعملو من الحبــــة قبّــــــــــة

    والســــــــــــــــــــلام ..

    رد
  14. ((طبعا و خصوصا بعد شي 8 ساعات دوام و ساعة ركض ورا المواصلات))

    لماذا دائماً الرجل يعتقد أنه وحده من يعمل و يتعب ويشقى و أن الفتاة لا عملَ لها / رافعة رجليها / ..

    أخي الكريم المرأة التي لا تعمل خارج المنزل .. تقوم بدور أسمى من كل الأدوار و هوَ تربية الأطفال .. ( إن الجنّة تحتَ أقدام الأُمهات )
    هذا الحديث كافي لأن تدركَ مدى أهمية عمل المرأة في منزلها و ربمــــا /بل و على الأغلب/ يفوق عملك تعباً و شقــــــــاء ..

    رد
  15. >>لماذا دائماً الرجل يعتقد أنه وحده من يعمل و يتعب ويشقى و أن الفتاة لا عملَ لها / رافعة رجليها /
    لم يصدر من أنس و لا مني اعتقاد كهذا و كلمة دائما تفيد الاستمرارية و بحالة ردك تعني التعميم و هو طبعا غير مقبول
    >>أخي الكريم المرأة التي لا تعمل خارج المنزل .. تقوم بدور أسمى من كل الأدوار و هوَ تربية الأطفال .. ( إن الجنّة تحتَ أقدام الأُمهات )
    ما حدا نكر
    بس بلش ردك يطلع عن المغزى الاساسي لل “البلغ”
    >>فكثير من المرات ما تعرضنا نحنُ الفتيات بأن يُأخذ دورنا من قِبل فتاة سليطة و حاطة كيلو مكياج و على آخر طرز
    طبعا مو قصدك انو كل بنت سبور هي سليطة , مو؟

    رد
  16. خيو أنوس بعد كل هالحكي السابق .. وجدت لك الحل الأنسب بحيث تستفيد من شغلة البنات وتحوله إلى صالحك .. عم تسألني كيف ؟؟ ..
    لأجاوبك : هلأ انزل على السوق واشتري باروكة أو شي إشارب، بعدين مر على محل ألبسة نسائية اشتريلك شي فستان على كيفك ولا تنسى الستيانات ، بعدين عميل طلة على محل المكياجات واشتريلك شوية مكياج وحمرا وبودرة وهالقصص كلها .. ارجع بعدين عالبيت واتعب على حالك شي نص ساعة على المراية ..
    وقت تخلص انزل عالشارع لتشوف كل شوفيرة وسائل النقل وقفولك ، وحياتك حتى السيارات العادية رح تزملك .. ووين ما رحت ووين ما اجيت أكيد رح تسمع : تفضلي يا أنسة .. تفضلي يا مدام .. شو أمرتي أختي .. وأنت بس قعود واطلب ما عليك شي .. كلو بيجي لخدامتك ..
    يا معلم عم قلك .. لتعيش حياة لك بالمنام ما بتحلم فيها ..

    رد
  17. يا سيدي ((مستر بلوند)) ذكرتني بشغلة…
    أيام الكلية في إحدى المواد نزل الدكتور المصون علامات العملي ورحت عم شوفهن فتبينلي أنا ورفقاتي أنو الدكتور لما حط علامات العملي أبداً لا تطلع على الاسم ولا على الحضور ولا على المذاكرات ولا على شي … صاحبنا بس اتطلع على خانة “الجنس” فكان لما يلاقي مكتوب بهالخانة كلمة “ذكر” يكسر بهالعلامات و أحسن علامة يحطها 20/30 (يبدو أنو عندو مشاكل مع هالكلمة ) أما إذا كانت كلمة “أنثى ” فيحط بقا 27 وطالع بغض النظر عن البنت بيعرفها،مابيعرفها،محتشمة،غير محتشمة، شاطرة،كسلانة فيومها قررنا أنا ورفقاتي بالمزح طبعاً نقدم طلب لعميد الكلية يكتبلنا قدام اسماءنا أنثى بركي بيتحسن وضعنا بالكلية ، طبعا إذا بدي أحكي عن التمييز بالكلية بين البنات و الشباب لبكرا ما بخلص من علامات لإعطاء الأسئلة للبنات و النوط ل…..
    بدي بس أحكي شغلة استقرأتها من التعليقات و خاصةً من تعليقات الأخت “رنا” ولكأن خط سير الحياة يتجه بقصد أو بدون قصد نحو الأصول ونحو الفطرة السليمة التي تقتضي أن المرأة جوهرة نفيسة يجب أن تحفظ ولا تنغمس في معارك الحياة و تذهب للأسواق و تقف بالأدوار و تحمل الأغراض و و و و فمكان المرأة هو الذي قال عنه الله تعالى مخاطباً زوجات النبي عليه الصلاة و السلام ( وقرن في بيوتكن …) هلأ لح تقلولي أني عدو المرأة و التطور و الحضارة ووووو
    لح قلكن طولوا بالكن عليي صح المرأة لازم تتعلم وتصير طبيبة ومهندسة و معلمة وهذا من حقها ولست ضد هذا الحق ولكن خلونا ننظر للأمور من جهة تانية من جهة ما تخسره المرأة من جراء انغماسها في المجتمع بغض النظر عما ينعكس على بيتها و الأولاد في حال أهملتهم
    مالح كمل مع أنو كتير في حكي بس لح أحكي قصة صارت معي من كم يوم كنت طالع بالمكرو قام وقفت المكرو امرأة تقريباً في الأربعين من العمر يبدولي وكأنها هلأ راجعة من وظيفتها حاملة معها كيسين شكلهن تقال وطالعة عالمكرو ومسكينة شو متلبكة فيهن وأول ما طلعت قبل ما تقعد طبعاً الشوفير صاحبنا شد هديك الشدة قامت المسكينة وقعت وقامت وقالت وعيونها تخضب بالبكاء ” مو حرام هيك تساوو بالمرأة ”
    حاجتي لعي…..

    رد
  18. أنا شخصياً بفضل أني قوم وقف بالباص و أعطي مقعدي لامرأة أو رجال كبير بالعمر أو حتى صبية من شان ما تأضي الطريق على الواقف بين ميت رجال “لأن ما بهون علي شي قليل أخلاق يعمل حالو أجدب و يلزق فيها كل ما وقف الباص و مشي بحجة القوة النابذة”، يعني بعتبرها متل إختي “مع أنو ما عندي للأسف”, طبعا هاد التصرف ناتج عن وازع داخلي متعلق بأديلوجيتي الدينية و الثقافية، و أنا ما بكون مستني منها أي شكر أو ثناء أو ابتسامة و معتبر الموضوع عبارة عن واجب من ضمن واجباتي الغير منتهية، للأسف المشكلة تكمن بالطرف التاني، مثلا تصير تتضحك بصوت عالي بدها تلفت نظر شي شب مثلا “بدون تعميم”. طبعا وقتها أنا بندم ليش قمت.
    شغلة تانية التصرف التصرفتو أنا ناتج عن قناعاتي مو من شان طبقها متل ما هي فكرت “ما عم عمم”، و طبعا مو ناتج كون لون دمها أزرق و أنا لون دمي أحمر و تصير تشوف حالها و ما تعود تتطلع بالعالم حوليها و ترفع راسها و يدق أنفها بسقف الباص كان هي ما بترك إلا “بالموزين” و لأول مرة عم تركب بالباص و أرفانة من العالم حوليها “بدون تعميم”
    الفكرة العم وصلها أني غالبا عم إندم ليش عم قوم للصبايا
    طبعا إذا امرأة كبيرة أو رجال كبير الموضوع حتمي بالنسبة إلي و غالبا بتكون ردات الفعل إيجابية لدرجة أني بخجل من كثرة الشكر و المدح خاصة من الرجال الكبار بالعمر، بس سوء الفهم من الصبايا كتير بسبب خيبات أمل و ببرهن على مدى إنتشار الأمراض و العقد النفسية و خاصة النرجسية منها ضمن شريحة الصبايا.

    رد
  19. في شغلة ثانية كمان مهمة .. بس هي بدون مزح :
    إنو المرأة السورية هي بطبيعتها ضعيفة .. ما بطالب بحقها، يعني مو بس الرجال ما بيعطيها حقها .. لأ هي كمان لا تطالب فيه .. وهذا الشي جعل الرجال يتنظر إليها من باب الشفقة وجبران الخواطر أحياناً .. وأحياناً ثانية لغايات خبيثة ..
    قصدي إنو المرأة ضعيفة .. إنو لو قارنتها مع نساء مصر فرضاً .. هنيك بتحس المرأة “أخت رجالة” .. بعكس عنا، أنا ما بطالب يصيروا هيك .. بس عالأقل تكوني قوية وقادرة تدافع عن حقها شوي ..

    يعني وقت يكون في دور وتجي حضرتها ويقوم الرجال من باب الشفقة يمشي أمورها .. من المفترض تصير قوية وهي ترفض هذا الشي وتوقف عالدور .. مرة بعد مرة بتختلف نظرة الرجال إلها وتتحول من نظرة الشفقة إلى نظرة الند بالند .. وهي النظرة الأخيرة ما هي عيب وما لازم تصير، بالعكس هيك وقتها كثير بتخف التحرشات والمعاكسات .. يعني المرأة إذا كانت بتطالب بحقوقها فهي لازم عالأقل تعرف كيف لازم تستخدم هذا الحق ..

    رد
  20. هاد نفس رأيي مستر بلوند يلي حكيتو لرنا .. انا مقتنع بشدة أنو لما المرأة بتصير الند للند للرجل بمجتمعنا بتخف التحرشات كتير .. ولحتى المرأة تصير تتعامل هالتعامل لازم تتحمل جزء من المسؤولية وتحاول تسعى لهالشي .. متل ما حكى مستر بلوند اذا رجال بدو يتجاوز الدور ويمشي أمورها لأنها امرأة لازم ترفض وتقلو معلش انا بوقف عالدور 🙂
    وبنفس الوقت ما تحكي مع الرجال بنشافة أو بشوفة حال أو بأسلوب كأنها جوهرة نادرة نازلة من الجنة 😉

    رد
  21. مرحبا من جديـــد

    أنس بعتذر ما بدي أحكي كتير بس غصبن عني ..
    وللأسف ما في غيري بنت عم تشارك وين العالم ما بعرف ..
    المهم كلام أبو عماد بيفش الخلق لأنو بيدل عالأخلاق ..
    مو هون النقطة يلي بدي قولا ..

    النقطة المهمة …
    أنو أكيد الفتاة أو المرأة بمجتمعنا عم تحاول تقوم بحالها .. نسبة المتعلمين كبرت والفتيات يلي عم تشتغل كمان .. ليش ؟؟ لحتى تشعر باستقلاليتها و ما تكون بعازة الرجال يلي يمكن يوم من الأيام يمننها أو يلحشا !! بس هون بنفس الوقت منوقع بمشكلة / عم تاخد دور الرجال / حيرتونا يعني

    فالبنت بتقول الله لا يعيزني لحدا حتى ما تتعرض لهيك مواقف …

    أنا مرة كنت راكبة بالباص وعجأة قام شب عم يضحك مشان يأعدني قلتلو معليش ما بدي مو مشان شي .. أحلى يفكر أعدت لسبب تاني .. الناس عنا مخون مفشكل حاكم وكل شي بيقلبو ..

    صراع المرأة والرجل عنا أمر مستمر دائماً وأبداً .. على الرغم يا أنس أنو الرجل هوَ مكمل للمرأة و ليسَ ندّاً لها هيك الله خلق البشرية
    مو متل بعض بس بيكملو بعض

    رد
  22. هلأ القصة ما بدها خناق
    ولا احساس بالنقمة على الجنس الانثوي سببه الاحساس بضعف الرجال أمام أحقية المرأة بمعاملة جيدة ومحترمة
    باعتقادي المرأة والرجل هما وجهان لعملة واحدة وصديقا درب.
    وخلينا نشوف الامر من زاوية اخرى يعني أنا بشوف الرجل اللي بالسيارة دبحه حلال لأنه استغل المرأة اللي معه لتنزل بالشوب تطلب الشاورما .
    يعني لو غيرنا زاوية الكاميرا بنشوف ان المرأة اللي بتستعجل تركب السرفيس حتى لو مليان يمكن تاركة اولادها الصغار بالبيت وبدها ترجع من شغلها لتطبخلهم هنن وابوهم.
    يا عزيزي المساواة موضوع نسبي والرؤيا اللي عم تحكوا فيها من زوايا أخرى هو ظلم عم يتطبق عالمرأة كل يوم وكل ساعة بقناع المساواة.
    وبتقلي زعلانييييين…. ايه الله يعيننا عليكم .

    رد
  23. >>المهم كلام أبو عماد بيفش الخلق لأنو بيدل عالأخلاق ..
    يعني اذا واحد ما قام بكون بلا اخلاق؟ 🙄
    ع هالحالة انا بلا اخلاق نهائيا

    رد
  24. >>ولا احساس بالنقمة على الجنس الانثوي سببه الاحساس بضعف الرجال أمام أحقية المرأة بمعاملة جيدة ومحترمة
    شرح يسير الفهم لمن لم يفهم “المجتمع الذكوري”
    >>وخلينا نشوف الامر من زاوية اخرى يعني أنا بشوف الرجل اللي بالسيارة دبحه حلال لأنه استغل المرأة اللي معه لتنزل بالشوب تطلب الشاورما
    طبعا لانو الشنططة بتجي كضريبة مع البكج للذكورة بمجتمعنا
    >>يعني لو غيرنا زاوية الكاميرا بنشوف ان المرأة اللي بتستعجل تركب السرفيس حتى لو مليان يمكن تاركة اولادها الصغار بالبيت وبدها ترجع من شغلها لتطبخلهم هنن وابوهم
    رجعنا للشفقة مرة تانية
    >>يا عزيزي المساواة موضوع نسبي والرؤيا اللي عم تحكوا فيها من زوايا أخرى هو ظلم عم يتطبق عالمرأة كل يوم وكل ساعة بقناع المساواة
    شرح أكثر يسرة “للمجتمع الذكوري”
    ببساطة البنت بتاخد يللي بيعجبها من المساواة و بتكب يللي ما بيعجبها

    رد
  25. ياسمينة شامية سؤال؟ إنت ليش ما قمتي للمرة الكبيرة بعتبار ما حدى من الشباب المزوقين قام، المسؤولية بتقع فورا عليكي بهل الحالة إلا إذا كنتي أكبر من هي الامرأة، هي شغلة
    شغلة تانية إذا كانت البنت سبور و كوول أنا ما بقوم لأن هي حابة تكون كوول و ما حدى ضربها على ايدها، بعدين هي ما صانت شخصها و عرضها و كونها حرمة “على فكرة كلمة حرمة تدل على قدسية المرأة و عرضها” لذلك أنا ما بتعب حالي و بحاول صون شي هي عم تعرضو للعموم.

    رد
  26. >>أبو علي والله ضحكتني
    ايجابا اتمنى 😕
    >>بس ليش حاطط نأرك من نأري أنا شو عاملتلك ؟؟ (*_*)
    اي ما كان في غيرك مشارك , شو ساوي؟ 🙂
    >>كلامك بيفش الخلق (^_^)
    طبيعي يعجبك الكلام 😉
    وافق سيدي ع التعليق , وافق

    رد
  27. أول شي رح إعتبر مقالتك هي لوم للشباب
    “المقطع الأخير” من المقال إنت عم تلوم الشباب إلي عم يخربطوا الدور ويمشوا البنات ..وهاد شي منيح وإيجابي.يعني المشكلة واضح مين المسؤول عنا..
    -رح قلك وجهة نظري..قلة الذوق موجودة عند الطرفين الشباب والبنات..في بنات وشباب بيطحشو ومابيهمن الدور..
    أما لما بيقوم شب بإعطاء دور أو مكان لبنت فهاد شي شخصي..وخاضع لقرار حر..يعني ماحدا جابرك تعمل هيك
    بس لأنو الرجل الشرقي..متعود إنو هو الرّجال وكلشي مسؤوليتو..
    فبيحس بتأنيب الضمير إذا ما قام وقف وعطا مكانو أو دورو
    وهاد الشي هو فرضو على حالو
    وبالمقابل مافيك تلوم شب ليش عطى مكانو.. هو شايف إنو هيك أريحلو
    -والجملة إلي زكرتا حضرتك
    ” إذا المرأة تعرضت لأنواع مختلفة من الظلم مو يعني تعمل فينا الشي يلي عم نشوفه هلأ ”
    شو عم تعمل المرأة؟؟
    بكل القصص إلي زكرتا القاسم المشترك إنو في شب عم
    عم يميز المرأة ويمشيها قبل ..
    -بيطلعلك حدا بيقول ” لازم” المرأة تصير قوية
    بيطلبو من المرأة إنو تصير قوية و تبطل ضعيفة شو هل الإزدواجية.. ..والله سياسية قرون من الدونية للمرأة مارح تلتغى بهل البساطة
    قاعدين عم ينظروا بكل برود شو لازم تعمل المرأة وشو لازم تتصرف…مارح تخلص المرأة بقى
    وكأنو هي أساس المشكلة
    كل شي عم نعيشو هو نتائج قوانينكن ونمط الحياة إلي فرضتو ..
    -وبالنسبة لأحد التعليقات عن التنكر بزي إمرأة .. المفارقة إنو هاد حلم كتير من البنات ..
    هي الامور إلي عم تحكوا عنا بتبقى أمور شكلية مقارنة بأمور كتير جوهرية عم تعرضلا المرأة
    واذا بدك بسردلك كتير أمثلة ..
    بس الرجل عنا مانو متعود على الإحساس بالظلم
    وبالنسبة للفكرة إلي حكيتا أنا “مو من زمان صار مسموح للمرأة تتواجد بالأمكنة إي زكرتا” كان قصدي بس المقارنة بين حالتين الظلم

    _من قرأة بعض التعليقات حسيت إنو ياسلام شو سهلة وسلسة حياة المرأة
    كل الدروب مفتوحة ومافي عقبات و لاقيود!!!!!

    -كتير منيح إنو الرجل أخيرا إقتنع بالمساواة بس إيمت إقتنع فيها لما حس إنو هو وحدو أكل الضرب ..هو وحدو عم يتعب
    والمسؤولية كلها عليه .وهاد شي بسبب القوانين والأفكار والعادات إلي هو عملها

    -فكرة أخيرة الشب إلي ما بيقوم مانو قليل ذوق ..بس ما فيك تقول عن الشب إلي بيقوم وبيعطي محلو إلا مزوق.
    بغض النظر إذا قبلت أخد مكانو او لأ.

    إلى ياسمينة شامية :لذيذ تعليقك وواقعي

    رد
  28. توضيح ..عن التنكر متل المرأة ..إنو المفارقة إنو هاد حلم كتير من البنات .إنو يتنكرو بزي شب..
    من زمان طبعا أكتر من هلق..بتعرف لأنو كان ممنوع البنت تتعلم وتشتغل..وتشوف حياتا و قراراتا وتحب علانية..وكتير قصص

    رد
  29. >>بس لأنو الرجل الشرقي..متعود إنو هو الرّجال وكلشي مسؤوليتو..
    >>الله سياسية قرون من الدونية للمرأة مارح تلتغى بهل البساطة
    >>كل شي عم نعيشو هو نتائج قوانينكن ونمط الحياة إلي فرضتو ..
    >>كتير منيح إنو الرجل أخيرا إقتنع بالمساواة بس إيمت إقتنع فيها لما حس إنو هو وحدو أكل الضرب ..هو وحدو عم يتعب والمسؤولية كلها عليه .وهاد شي بسبب القوانين والأفكار والعادات إلي هو عملها
    عدد ثلاثة من تعريفات المجتمع الذكوري و الرجل الشرقي و اشرح واحدة منها
    يخزي العين شو عندكن تعابير و تعاريف جاهزة للرد
    متل ما قلت أنس , هولوكوست 🙂
    او عقدة الماسادا
    >>بس ما فيك تقول عن الشب إلي بيقوم وبيعطي محلو إلا مزوق.
    او مفكر انو اذا قام رح تطلع عليه طوال الروحة لحتى اخر شي تعطيه رقم موبايلها
    وافق سيدي وافق , شراب شاي 🙂

    رد
  30. lee
    >>من المقال إنت عم تلوم الشباب إلي عم يخربطوا الدور ويمشوا البنات
    معك حق و من اليوم ورايح ما عاد أعطي دوري لأي صبية شو ما كان الوضع مو من شان شي بس من شان ما خبص الدور و حافظ على المسواة بين المرأة و الرجل
    >> بس الرجل عنا مانو متعود على الإحساس بالظلم
    معناها اتفقنا أنو الرجال عم ينظلم
    >>بس إيمت إقتنع فيها لما حس إنو هو وحدو أكل الضرب ..هو وحدو عم يتعب
    شكرا لشفافيتك بالتعبير و الإعتراف أنو عم ناكل الضرب وحدنا و عم نتعب

    على كل حال نحنا عم نعالج موضوع كبير من منظور ديق
    (مشكلة الدور و أو المقعد بالباص)
    رح حاول و ضح و جهت نظري من منظور أوسع
    أنا مزعوج كتير من الفكرة تبع “المساواة بين المرأة و الرجل” لأن هي بالأساس غلط، إذا بدنا نحكي على المساواة ليش الرجال هو المسؤول عن شراء البيت و السيارة لوحدو ليش هدول شروط أساسية للزواج و كأنها ضربة لازمة يكون الشب دافع شي عشر ملاين ليرة شقاء عمره بين بيت و سيارة و عرس (شو بس هو بدو يتزوج)، ليش البنت ما تساهم بعتبار في المساواة بينها و بين الرجل مثلا،
    على فكرة أنا بدي أخد وحدة تكون مستعدة للتعتير متلي متلها توقف معي مو فوقي لأني مالي مستعد ضيف عبء جديد على حياتي.

    رد
  31. شكلو النقاش ما رح ينتهي مستمر لأبد الآبدييييييييين ..
    بس منيح كم وحدة فاتو وعلقــــــوا :]

    أخي يلي بدو يقوم يقعد بنت محلو يقوم و يلي ما بدو يصطفـــــل ؛)
    بس بتعرفو نحنا البنات منفضل المشي على ركبة الباصات المعتة ووسائل النقل المبهدلة عفواً من هالكلمة

    أنا مع المساواة ببعض القضايا وضدها بقضايا أُخرى !

    رد
  32. يا لطيف شو سئيل وغليظ كمان يعني بعد كل ها البهدلة يلي تبهدلتها البنت وصارت تطلع تشتغل متل الأوادم وهي أبوها من جهة وأخوها من جهة وبعدين بيجي جوزها من جهة تانية كلون بيستوطوا حيطها
    ما بيحقلها شوي تتدلل وتحس حالة محترمة في مكان ما في هدول العالم سابقي الذكر
    هي شغلة الشغلة التانية البنت بتتعب بسرعة وتمرض بسرعة تخيل هي البنت تكون حامل ودايخة وعم تنتظر سرفيس 3 ساعات وما اجا أو حاملة ابنها وراكضة من مكان لمكان لأنو ما في رجال يساعدها
    كمان البنت آخذه حقها وزيادة أنا معك بس بالشام لانو شباب الشام جنتل كتير أما بغير مناطق يا حرام لسا ما وصلوا لفكرة تحرر المراة

    رد
  33. >>يا لطيف شو سئيل وغليظ كمان
    مين؟
    >>يعني بعد كل ها البهدلة يلي تبهدلتها البنت وصارت تطلع تشتغل متل الأوادم وهي أبوها من جهة وأخوها من جهة وبعدين بيجي جوزها من جهة تانية كلون بيستوطوا حيطها
    اي حيرتونا , مرة بدكن تشتغلو و مرة الشغل بيصير بهدلة
    >>ما بيحقلها شوي تتدلل وتحس حالة محترمة في مكان ما في هدول العالم سابقي الذكر
    يعني يدللها الغريب؟
    >>البنت بتتعب بسرعة وتمرض بسرعة تخيل هي البنت تكون حامل ودايخة وعم تنتظر سرفيس 3 ساعات وما اجا أو حاملة ابنها وراكضة من مكان لمكان لأنو ما في رجال يساعدها
    ليش اللف و الدوران ع قصة الشفقة؟
    اذا بتتعب بسرعة و تمرض بسرعة بلا ما تشتغل

    رد
  34. مرحبا شباب ..
    شوفو هالموضع مالو نهاية لأنو عم نتناقش بزمن ماحدا عرفان الصح من الغلط وكل واحد اخد شي من نفسة وشي من أديلوجية غيرو وشي متأسر بشي موقف بقى يلي متوقع يقنع غيرو برأيو شي صعب, بس مع ذلك أنا برأيي توضيح وجهات النظر تبع المجتمع حلو و هي حالة صحية.
    المهم حقول رأيي أنا بصراحة مع إحترام مكانة المرأة وبرأي المرأة جوهرة نازلة من الجنة إذا هي عاملت حالا هيك يعني إذا ما في داعي تشتغل برا البيت ما في داعي تعتبر حالا مستقلة مشان تتفزلك وتعمل حالا متل الرجال ” طبعا بلا تعميم” وتاخد مكان شي رجال محتاج الوظيفة مشان يطعمي ولادو وإذا ما كان في ضرورة تنزل عالسوق مافي داعي تنزل مشان تعمل شوبنغ وتغلبنا بالمواصلات وإذا ما لا مضطرة لتاكل بالطريق ولقت المحل محشي بالرجال لا تفوت عالمحل وتحرج حالا وتغلبون وإذا ..وإذا …وإذا..في كتير قصص المرأة هي بتفرضون على حالى ما لا مضطرة ” طبعا بلا تعميم”, بنفس الوقت إذا شاف الرجال بنت أو مرا شكلا محترمة”المحترم ما بخبي حالو” ووقفلا أو مشاها أبلو عالدور او ساعدا حتى بحملان الغراض هو ما بيكون نقص شي”والمنيحة ما بتضيع مع الله” بس كمان المرا لا تزودا وتشوف حالا أنا ألت أنها جوهرة بامكانة.
    أما بالنسبة للظلم فالمجتمع كلو ظالم ومظلوم رجال ونساء بقى لا حدا يزعل على حالو, وعلا فكرا أنا مع رأي أبو عماد تقريبا بكل شي

    رد
  35. السلام عليكم abo 3amad
    ولكل الحاضرين
    أنا عن نفسي لما بكون راكبة بالباص الاخضر بقوم وبأعد الكبار ازا كانو ختايرة سواء رجال او نسوان بس كيف بدي قوم بامكرو مشكلة وبخبط بهاد وهاد فكر فيها انت احسن ما تلومني
    بعدين انا عم احكي عن عموم الشباب لانو هاد اللي عم يصير ةفعلا كتير البنت السبور موقرة ومحترمة بالنسبة الهون

    رد
  36. و عليكم السلام ياسمينة شامية
    إذا بالمكرو “معك حق” بس بالنسبة للشباب هدول مو شباب هدول “أراضة”، و بعدين هدول الأراضة مزبوط عم يدلولوها للصبية السبور بس أكيد مو محترمينها أو موقرينها، بتصور النية واضحة و ما بدها شرح، بعدين في دعوة أنا كتير بحبها “الله لا يحيجك و لا يحيجنا إلا لوجه الكريم” مزبوط؟.

    رد
  37. يعني و الله غريبه و الله نحنا الي صرنا مظلومين بهل الحاله :S

    ا نا ما بقى اوم لبنت غير ليكون عمرا فوق 30 و تكون مستوفيه شروط الحجاب و عدم وضع المكياج والا بيرتفع العمر لل50

    و بعدين و الله شغله غريبه انو وحده قاعده ورا المرايه نص يوما و ما بدا الذعران الهمجيين يلطشوها

    انا من جهتي ولا مره شفت وحده متقيه الله و حدا عم يلطشها يعني الحق على البنات بهلشغله 95%

    لعمش على الوقاحه في وحده مره وصلت معها الوقاحه لدرجه انو فيئتني مشان تندفس و عمرها حوالي ال20 لا و المشكله انا كوول و سبور و طبعا كا نت ردت فعلي ((التطنيش)) و انا مالي حاسس لا بل ندم ولا بطيخ

    هاد الحكي لا يعني انو مافي حالات استثنائيه و لا يعني اني ما بقوم للناس اللي بيستحقو هل الشي ب العكس انا بروق لما بحس حالي ساعدت حدا و بنسى كل تعبي و همي

    رد
  38. بصراحه يعني معك حق وشوي لا لان انا لو اختي محل أي وحده من هدول مع ان ما بخليها تنحط بهيك موقف او لانه ما عاشتبسوريا ما بتعرف تتصرف واذا كانت عم تستنه سرفيس ممكن تنام بشارعولا تركب سرفيس معبه لانه ما بتعرف كيف تتصرف بتمنه ان حد يساعد ويكون شهم ويمشيه اول شي مشان هيك انا بقول اول شي النساء

    اما بخصوص شعبه التجنيد والجاده تبعهم والله شو بدي احكي هم بيمشو على المظاهر لذلك انا لما بروح متعود اكون على احدث طراز ممكن يشغوه بحياتهم يعني منخيري فوق والخاتم الي عم يلمع والكندره الي يمكن تكون رخيصه بس بتوج وج واحلا العطور الي بتفوح عن بعد 300 متر مع انيانا ما بحب العطور وبموت من الريحه والملابسوما ادراك واخر شي الطاقيه الحزبيه مع انه لجدي )والله اذا ما بتمشي وراقي خلال خمس دقائق فقط ومع ضيافه والشاي وسكره بكون كذاب عنجد هيك
    ولكن في احد المرات رحت وكنت نايم عند صديقي بجانب المشعبه شو طلعو عيني تعبوني كتير بس قررت روح على بيتي وأرجع وبهدلتن بعدين.

    رد
  39. أنا بأيد الشعار , لسبب أنو مرة كنت طالع بالباص ووقفت مرأة مو كتير كبيرة بالعمر قدامي و تمت تتطلع فيني لحتى قوم و تقعد قلت مو حلوة بيجوز تكون تعبانة بس بعد ماقمت طلعت فيني تقول كأنو واجب علي قوم وهي تقعد بدون ما تقول شكرا” أو يسلموا ولا حتى أي بادرة , عن جد قلة ذوق يعني مارح ينقطع لسانها أو نقول عليها مو منيحة , يعني بحياتي ما قمت لمرأة أو بنت أو صبية أو مهما تكون و قالت شي بيدل على أنو أنت عملت عمل جيد , بعدها حرّمت قوم لحدا الا إذا كان عن جد بحاجة متل مرأة مسنة أو رجل مسن , ما أنا متل المرأة ماحدا مصنوع من حديد .

    رد
  40. هاي انس بصراحة انا معك نوعا ما يعني مثلا انا ما بخلي حدا يقوم من السرفيس لانو موقف كتييييييييير بشع يعني بحب اعتمد ع حالي بكلشي واذا وقفت لاشتري شاورما بعامل صاحب المحل بجدية كبيرة لا بضحكلو ولا شي وهيك اذا هوي لانو مزوق بيمشيني ما عندي مانع اما غير هيك لا اي بس والله الشغلة عادية مو لهدرجة يعني كل هالاشيا اللي بتحقلكن وكل هالحرية اللي عايشينا حاسدين هالبنات ع شوية دلااااااااااااااااااااال دللونا شوي دللونا يا زلمة والله غير الله ما قالا اساسا انتو الرجال بدكن كلشي لصالحكن وبرايي كمان مو كل البنات بينعطو وش

    رد
  41. السلام عليكم
    أنتم جايين تحاربوا البنات علما أنو الحق مو عالبنات بكل اللي عم يصير
    يعني على مثال محل الشاورما جرب ووقف بنت هي بالمحل بتشوفها رح تصير تمشي الشباب وتخلي البنات المساكين يستنو
    يعني ببساطة الشب اللي عم يمشي البنت قبل الشباب همو انو يبين ظريف وشهم وأكابر قدام البنت بس مو همو شلون رح يبين قدامكم صح؟؟

    رد
  42. مرحبن
    أنا ماقرأت التعليقات كلها ..المهم
    بس أنه بلا ليديز بلا فيرست ومدري شو لليديز بس ولا كمان للختايرية ؟؟
    بس لأحكي شغلو لحتى نساوي معاملة الرجلة بمعاملة المرأة بطابور ما مثلا لازم نفصلن
    خدلك مثال طابور فرن الخبز بتلاقي بأغلب الأفران طابور النسوان لحال والرجال لحال
    هاد عدا لاتقلي ؟! ايوااااا
    أحيانا الشغلة بتتعلق بالبنت نفسها بتكون مايعة وبتطالع الروح وطلعة ع الباص وتعبانة عأساس وهالشب مابيهون عليه ..ايه كيف لكان
    كمان بالنسبة لقصة الباص والسرفيس ..حكيك ع السرفيس صح 100 % بس الباص طبعا منعرف أنه الواقفين أكتر من القاعدين بس أنه نقوم للكبارية مو أكتر
    يعني والله كتير قلة زوق وقت يكون شب بطول وعرض وصحة قاعدة على كرسي والباص مليان وجنبو واقفة وحدة ختيارة أو حتى ختيار ..يعني حتى في بنات صبايا بيقوموا لرجال ونسوان ختايرية هاد زوء مو لايديز فيرست 🙂
    يعني بالمختصر في بنات بيزودوها وفي بنات ما اشبهم شي مابيحبوا ينحطوا بهيك مواقف ..حتى لو كان موقف محل الشاورما 🙂
    سلااااااااااااااااام

    رد
  43. له يا أخ أنس …هي ما حبيتا منك …..
    يعني عن جد ما بقى عنا غير هالشوية النخوة حلوة بمجتمعنا وإذا راحت هي كمان ..معناتا ما ضل عنا شي …!! بيجوز في بعض الأمثلة السلبية للموضوع كلياتنا شفنا منا … بس هاد ما بيمنع أنو هي ظاهرة حلوة عنا
    ..كتير حلو الشب لما بيتخيل أخته أو زوجته مكان هالليدي …. والناس عم تتطلع فيا أو تزاحماعن قصد أو بدون بالباص أو أي مكان تاني ….وبعدين بيتصرف ع هالأساس …. وشكرا

    رد
  44. السلام عليكم
    هلق بلا ليدز فهمنا . البطيخ شو دخلو بالنص ؟ لتكون حضرتك ما بتحب البطيخ . والله البطيخ طيب . الله يسامحك متل ما عبتغلط على البطيخ . اتمنى تقدم اعتذار رسمي للبيطخ

    رد

اترك رداً على Abo 3li إلغاء الرد